North Hunt

Dagana 17.-21. ágúst sl. tóku nokkrir félagar í North Hunt hópnum þátt í málstofu um sjálfbærar skotveiðar í Vaasa í Finnlandi. Yfirskrift málstofunnar var Sjálfbærar skotveiðar  -  Leiðir til auka fjölbreytni starfa í dreifbýli.  Þessi málstofa var hluti af 23. alþjóðlegu ráðstefnunni um félagsvísindi í dreifbýli í Evrópu, Efling dreifbýlisins – samband samfélags og náttúru. Þátttakendur ráðstefnunnar voru á fimmta hundrað sem komu víðsvegar að úr heiminum og skiptust þeir niður á 39 málstofur.

 

Í málstofunni um sjálfbærar skotveiðar voru alls sex erindi frá fimm löndum. Málstofan hófst á erindi Anne Matilainen og Susanna Keskinarkaus frá Ruralia-stofnuninni hjá Háskólanum í Helsinki um viðhorf veiðimanna til skotveiðitengdrar ferðaþjónustu og hinnar núgildandi stefnu um skotveiðileyfi sem forsendu fyrir félagslegri sjálfbærni í Finnlandi. Á eftir þeim talaði Yvonne Gunnarsdotter mannfræðingur við Landlagsskipulagsdeild Landbúnaðarháskólans í Svíþjóð um sænska elgsveiðimenn og kynni þeirra af ferðaþjónustu í kringum danska og þýska veiðimenn á elgsveiðum. Næstur í röðinni var David Watts frá Háskólanum í Aberdeen, Skotlandi sem talaði um viðhorf hagsmunaaðila til skotveiðitengdrar ferðaþjónustu og sjálfbærnisjónarmiðin í Skotlandi. Því næst kynntu Mikael Nygård og Lorenz Uthardt hugleiðingar sínar um skotveiðitengda ferðaþjónustu sem tækifæri fyrir dreifbýl svæði eða ógn við skotveiðar heimamanna. Auk þess kynntu þeir rannsókn sína um viðhorf finnskra veiðimanna til skotveiðitengdrar ferðaþjónustu. Næst var komið að íslenska hópnum, en erindi Eyrúnar Bjarnadóttur og Hjördísar Sigursteinsdóttur fjallaði um nýtingu skotveiðiréttar á einkalandi sem tekjugrundvöll fyrir landeigendur. Síðastur í pontu var David Scallan frá Landfræðideild Háskóla Írlands (National University of Ireland) sem talaði um stöðu skotveiða á dreifbýlum svæðum Írlands út frá hagrænu sjónarhorni.
Erindin voru öll mjög áhugaverð og vörpuðu þau ljósi á stöðu skotveiða í hverju landi fyrir sig.  Jafnframt spunnust miklar umræður milli málstofugesta sem voru þó sammála um að þó margt sé líkt á milli landanna þá væri margt líka ólíkt og þess vegna væri mikilvægt að skoða skotveiðarnar í stærra samhengi, s.s. samfélag, menningu o.fl.